កូនខ្មែរបង្កើតកម្មវិធីទូរស័ព្ទដ៏ពិសេសមួយ ដើម្បីឆ្លើយតបនឹងបញ្ហាកកស្ទះចរាចរណ៍នៅកម្ពុជា
បញ្ហាកកស្ទះចរាចរណ៍ គឺជាបញ្ហាដ៏ធំមួយដែលយើងកំពុងតែជួបប្រទះជារៀងរាល់ថ្ងៃនៅក្នុងទីក្រុងភ្នំពេញ។ ការកកស្ទះចរាចរណ៍មិនត្រឹមតែធ្វើអោយតែធ្វើអោយយើងខាតបង់ពេលវេលាដ៏មានតម្លៃរបស់យើងនោះទេ ប៉ុន្តែក៏បានបង្ករអោយយើងមានអារម្មណ៍ធុញថប់ បង្ករជាស្ត្រេស្ត និងប៉ះពាល់ដល់សុខភាពរបស់យើងផងដែរ។ ដោយសារតែទំហំនៃការកកស្ទះចរាចរណ៍នេះកាន់តែកើនច្រើនៗឡើងពីមួយថ្ងៃទៅមួយថ្ងៃនោះ ទើបកូនខ្មែរម្នាក់ សម្រេចចិត្តបង្កើតកម្មវិធីទូរស័ព្ទដ៏ពិសេសម្យ៉ាង ដែលវាអាចជួយសម្រួលបញ្ហាកកស្ទះចរាចរណ៍នេះអោយធូរស្រាលជាងមុនបាន។
លោក វ៉ា កូរ៉ា គឺជាស្ថាបនិកកម្មវិធី Chatomuk Traffic មានអាយុត្រឹមតែ 28 ឆ្នាំតែប៉ុណ្ណោះ ដែលលោកបានបញ្ចប់ការសិក្សាថ្នាក់អនុបណ្ឌិតផ្នែកបច្ចេកវិទ្យាទំនាក់ទំនងមកពីក្រុងតូក្យូ ហើយគាត់ក៏មានបទពិសោធន៏ធ្លាប់បម្រើការងារនៅក្រុមហ៊ុនដ៏ល្បីល្បាញក្នុងប្រទេសជប៉ុនឈ្មោះថា Rakuten ផងដែរ។ ទោះបីជាជីវិតរបស់គាត់នៅទីនោះមានភាពល្អប្រសើរ និងមានប្រាក់កម្រៃដ៏យ៉ាងណាក៏ដោយ ក៏ប៉ុន្តែលោក វ៉ា កូរ៉ាមានបំណងប្រាថ្នាដ៏ធំមួយក្នុងការបើកអាជីវកម្មមួយដោយខ្លួនឯង ហើយសម្រាប់សមិទ្ធផលដំបូងដែលគាត់់បានបង្កើតឡើងនេះគឺជាកម្មវិធីសម្រាប់ស្មាតហ្វូន ដែលវាប្រើដើម្បីសម្រួលស្ថានភាពចរាចរណ៍នៅក្នុងប្រទេសកម្ពុជាយើងឈ្មោះថា Chatomuk Traffic នេះតែម្តង។
កម្មវិធី Chatomuk Traffic នេះ វាគឺជាកន្លែងផ្តល់ និងទទួលដំណឹងផ្សេងៗទាក់ទងទៅនឹងស្ថានភាពចរាចរណ៍នៅក្នុងព្រះរាជាណាចក្រកម្ពុជាយើង បានយ៉ាងរហ័ស និងមានភាពងាយស្រួលបំផុត។ ឧទាហរណ៍ថា យើងកំពុងតែធ្វើដំណើរតាមផ្លូវមហាវិថីព្រះមុន្នីវង្ស ក៏ប៉ុន្តែស្រាប់តែមានចំណុចកកស្ទះដ៏ធំមួយនៅម្តុំអាគារ 42 ជាន់ ដូច្នេះយើងគ្រាន់តែបើកកម្មវិធី Chatomuk ហើយរាយការណ៍ពីស្ថានភាពចរាចរណ៍នៅទីនោះទៅជាការស្រេច។ កម្មវិធីនេះមានអត្ថប្រយោជន៍ច្រើនណាស់ សម្រាប់ការធ្វើដំណើររបស់យើង ព្រោះមុនពេលដែលយើងចេញទៅកន្លែងណាមួយ យើងអាចឆែកមើលប្លង់សិន ថាតើចំណុចត្រង់ណាមានការកកស្ទះខ្លះ ដើម្បីប្រុងប្រៀបជិះតាមផ្លូវដទៃ រឺក៏ផ្លូវវៀងជាដើម។
នៅក្នុងកម្មវិធី Chatomuk Traffic ជំនាន់ដំបូងនេះ វានៅមានចន្លោះប្រហោងបន្តិច ប៉ុន្តែលោក វ៉ា កូរ៉ា និងបន្ថែមមុខងារពិសេសៗបន្ថែមទៀតទៅក្នុងកម្មវិធីនេះ។ លោកបានអោយដឹងថា “ នៅពេលឆាប់ៗខាងមុខនេះយើងចង់អោយអ្នកប្រើប្រាស់អាចបញ្ចូលរូបភាពរបស់ស្ថានភាពចរាចរណ៍ ទៅក្នុងប្រព័ន្ធកម្មវិធីនេះបាន ហើយយើងក៏អាចចែកចាយនូវឈ្មោះផ្លូវដែលយើងចូលចិត្តធ្វើដំណើរបានផងដែរ។ ដូច្នេះនៅពេលដែលយើងមានបញ្ហាស្ទះចរាចរណ៍ត្រង់ចំណុចណាមួយនៃផ្លូវដែលពាក់ព័ន្ធនោះ យើងនឹងធ្វើការជូនដំណឹងដល់អ្នកដំណើរវិញបានភ្លាមៗផងដែរ”។
ចូលរួមកាត់បន្ថយបញ្ហាកកស្ទះចរាចរណ៍ទាំងអស់គ្នា ដោយដោនឡូដកម្មវីធីនេះដាក់ស្មាតហ្វូន រឺក៏ថេប្លេតរបស់អ្នកណា ដែលវាអាចដំណើរការបានជាមួយទាំងប្រព័ន្ធប្រតិបត្តិការណ៍ iOS និង Android។ នាពេលបច្ចុប្បន្ននេះ ចំនួនអ្នកប្រើប្រាស់កម្មវិធីមួយចំនួន 3000 នាក់ជាងហើយ ដូច្នេះបើយើងចូលរួមចែករំលែកពីស្ថានភាពចរារណ៍ទាំងអស់គ្នា នោះយើងនឹងកាន់តែមានភាពងាយស្រួលក្នុងការធ្វើដំណើរនៅលើដងផ្លូវ។
សូមចុចទីនេះ ដើម្បីដោនឡូដកម្មវិធី Chatomuk Traffic សម្រាប់ Android
សូមចុចទីនេះដើម្បីដោនឡូដកម្មវិធី Chatomuk Traffic សម្រាប់ iOS
