ហេតុផលធំៗទាំង 5 ដែលអ្នកប្រើប្រាស់ស្មាតហ្វូន Android ចូលចិត្ត Root ទូរស័ព្ទខ្លួន
តើអ្នកទាំងអស់គ្នារាល់ថ្ងៃកំពុងប្រើប្រាស់ស្មាតហ្វូនដំណើរការដោយប្រព័ន្ធប្រតិបត្តិការ Android ឬ iOS? បើអ្នកកំពុងប្រើប្រាស់ទូរស័ព្ទ Android តើអ្នកដឹងថា Root គឺជាអ្វីដែរឬទេ? មានអ្នកខ្លះប្រហែលជាបានដឹងរួចទៅហើយ តែខ្ញុំជឿជាក់យ៉ាងមុតមាំថា មួយចំនួនទៀតក៏មិនទាន់ដឹងច្បាស់ដែរថា Root ហ្នឹងស្អីគេឡើយ ដូច្នេះ Cambo Report សូមនិយាយនែនាំ ក៏ដូចជាប្រាប់អំពីអត្ថប្រយោជន៍ធំៗចំនួន 5 ដែលភាគច្រើនអ្នកប្រើប្រាស់ទូរស័ព្ទ Android ចូលចិត្តធ្វើការ Root ទៅលើទូរស័ព្ទរបស់ខ្លួនអោយអ្នកតាមដានពត៌មានទាំងអស់បានដឹងគ្រប់ៗគ្នាដូចខាងក្រោម។ តែជាដំបូងយើងនឹងរៀបរាប់អំពីវាជាមុនសិន។
តើ Root គឺជាអ្វី? Root គឺជាដំណើរការមុខងារមួយនៅលើម៉ាស៊ីនស្មាតហ្វូន ឬថេប្លេតរបស់អ្នក ដើម្បីអោយម្ចាស់ម៉ាស៊ីនមានសិទ្ធគ្រប់គ្រាន់បញ្ជាទៅលើមុខងារទាំងអស់របស់ឧបករណ៍ មិនថាអ្នកចង់ធ្វើអ្វី ផ្លាស់ប្ដូរអីទាក់ទងនឹងការបញ្ជាទៅលើផ្នែកទន់ និងរឹង (Software & Hardware) និយាយអោយខ្លីទៅអ្នកគឺជាអ្នកបញ្ជាទៅលើម៉ាស៊ីន អោយដំណើរការទៅតាមចិត្តចង់ ឬតាមក្បាលវ៉ាល់។
តើខ្ញុំគួរតែ Root ម៉ាស៊ីនរបស់ខ្ញុំទេ? វាស៊ីសងទៅលើការប្រើប្រាស់របស់អ្នក បើអ្នកគិតថាអ្នកមិនសូវជាលេងកម្មវិធីនោះទេ ហើយប្រើប្រាស់ទូរស័ព្ទធម្មតាទុកគ្រាន់ថតរូប ស្ដាប់តន្ត្រី ទស្សនាវីដេអូ ឆែកអ៊ីនធឺណែត ឬ Call/SMS អ្នកមិនចាំបាច់ Root នោះទេ។ សម្រាប់អ្នកលេងកម្មវិធីច្រើនដូចជា Tool កែប្រែកម្លាំងម៉ាស៊ីន ផ្លាស់ប្ដូរ Rom ថ្មី ដាក់ពុម្ភអក្សរខ្មែរ……-ល- អ្នកគួរតែ Root ម៉ាស៊ីនរបស់អ្នកទៅគឺពិតជាល្អខ្លាំងណាស់។
តើ Root មានអត្ថប្រយោជន៍អ្វីខ្លះ? វាមានផលប្រយោជន៍ច្រើនណាស់ប្រិយមិត្តទាំងអស់គ្នា បានជាអញ្ចឹងហើយ Cambo Report សូមលើកយកចំនុចធំៗទាំង 5 ដែលអ្នកប្រើប្រាស់ស្មាតហ្វូន Android ភាគច្រើនចូលចិត្ត Root ទូរស័ព្ទរបស់ពួកគេមកជម្រាបជូនអោយបានដឹងគ្រប់ៗគ្នា។
អត្ថប្រយោជន៍ធំទាំង 5 មានដូចខាងក្រោមនេះ
1. អាចធ្វើការ Backup អ្វីទាំងអស់ដែលមាននៅក្នុងម៉ាស៊ីន
នាពេលបច្ចុប្បន្ននេះស្មាតហ្វូនកាន់តែទំនើប ដូច្នេះហើយបើអ្នកហ៊ានតែធ្វើអ្វីខុសឆ្គងពាក់ព័ន្ធទៅនឹងផ្នែក Software របស់វាទូរស័ព្ទរបស់អ្នកអាចនឹងខូច ឬភាសាបច្ចេកទេសហៅថា Brick ដូច្នេះកាលណាទូរស័ព្ទរបស់អ្នក Brick ឬខូចប្រព័ន្ធដំនើរការ គឺវាមិនអាចបើកម៉ាស៊ីនប្រើប្រាស់បាននោះទេ ហើយរាល់កម្មវិធី ឯកសារ លេខទូរស័ព្ទមិត្តភក្ដិ ក្រុមគ្រួសារ និងអ្វីៗទាំងអស់ដែលមាននៅក្នុងម៉ាស៊ីនគឺត្រូវខូចខាតស្ទើរតែទាំងអស់ ហើយអ្នកអាចធ្វើការទាញ ឬ Restore បានតែកម្មវិធីមួយចំនួនតូច រួមនឹង Contact ឈ្មោះប៉ុណ្ណោះ រីឯអ្វីផ្សេងៗទៀតដូចជារូបភាព ឯកសារសំខាន់ៗ ហ្គេម តន្ត្រី វីដេអូគឺត្រូវខ្ទេចទាំងស្រុង។
អញ្ចឹងដើម្បីដោះស្រាយបញ្ហានេះបាននៅពេលទូរស័ព្ទ Brick តើយើងត្រូវធ្វើយ៉ាងណាខ្លះ? ជាក់ស្ដែងដើម្បី Restore នូវអ្វីដែលអ្នកចង់បាននៅក្នុងទូរស័ព្ទមកវិញគឺតម្រូវអោយអ្នកធ្វើការ Root ទូរស័ព្ទ ហើយប្រើប្រាស់កម្មវិធីជំនួយដូចជា Titanium Back និង ClockworkMod Recovery ជាដើម ដូច្នេះហើយអ្នកអាចរីករាយធ្វើការ Restore ឯកសារជាច្រើនដែលបានបាត់បង់តាមចិត្តចង់ មិនថាគេហទំព័រដែលអ្នកចូលចិត្តបើកអាននៅក្នុងកម្មវិធីឆែកអ៊ីនធឺណែតរបស់អ្នកក៏ដោយ និយាយរួមទៅគឺ Restore បាន 99% ឯណោះ។
2. មានសិទ្ធតម្លើងប្រព័ន្ធប្រតិបត្តិការជំនាន់ចុងក្រោយបាន
សម្រាប់អ្នកប្រើប្រាស់ Android ទាំងអស់ប្រហែលជាធុញទ្រាន់ណាស់ហើយបើអ្នកកំពុងប្រើប្រាស់ទូរស័ព្ទដំណើរការដោយប្រព័ន្ធប្រតិបត្តិការជំនាន់ចាស់ ព្រោះវាមិនរលូន ហើយមិនសូវ Support ជាមួយកម្មវិធី និងហ្គេមថ្មីៗឡើយ។ តែបើអ្នកមានថវិកាច្រើនអ្នកអាចទិញទូរស័ព្ទ Android ស៊េរីខ្ពស់ៗដំណើរការដោយប្រព័ន្ធប្រតិបត្តិការចុងក្រោយយកមកប្រើប្រាស់ដែលមានមុខងារថ្មីៗច្រើនដូច Android KitKat ជំនាន់ 4.4.X ដែលទើបនឹងប្រកាសចេញថ្មីៗកន្លងទៅ។ ខ្ញុំវិញជឿថាមានអ្នកប្រើប្រាស់ស្មាតហ្វូន Android រាប់លាននាក់នៅពេលនេះមិនទាន់មានឱកាស Update ទៅកាន់ Android KitKat យកមកប្រើប្រាស់នៅឡើយ បើទូរស័ព្ទអ្នករាងថ្មីបន្តិចនោះក៏តម្រូវអោយចាំ 6 ទៅ 10 ខែដែរ ទម្រាំ Google ឬក្រុមហ៊ុនបើកអោយ Update។
អញ្ចឹងហើយតើអ្នកត្រូវធ្វើយ៉ាងណាទៅដើម្បីអាចប្រើប្រាស់ Android ជំនាន់ចុងក្រោយ ឬស៊េរីខ្ពស់នៅលើទូរស័ព្ទស៊េរីចាស់របស់អ្នក? គឺមានតែវិធី 2 ប៉ុណ្ណោះ ដោយធ្វើការចាំ Update ឬ Root ទូរស័ព្ទយកតែម្ដង។ ក្រោយពេលអ្នក Root ទូរស័ព្ទបានជោគជ័យ 100% អ្នកអាចទៅកាន់គេហទំព័រផ្សេងៗជាច្រើន ហើយទាញយក Custom ROMs ទៅតាមចំនង់ចំនូលចិត្តដែលអ្នកចង់បាន តែត្រូវ Download អោយចំ ROMs ណាល្អហើយដំណើរការបានស្រួលទើបអ្នកអាចប្រើប្រាស់បានរីករាយនៅក្នុងទូរស័ព្ទ។
3. កែប្រែទូរស័ព្ទអ្នកអោយប្លែក អស្ចារ្យ និងមានអារម្មណ៍ថ្មីស្រឡាង
ដូចអ្វីដែលខ្ញុំបានប្រាប់ខាងលើរួច ក្រោយពេលអ្នក Root ទូរស័ព្ទរបស់អ្នកបានសព្វគ្រប់គឺអ្នកជាម្ចាស់បញ្ជាទៅលើអ្វីៗដែលអ្នកចង់បាន ហើយថែមទាំងអាចធ្វើអ្វីអោយហួសហេតុជាជាងអ្វីដែលទូរស័ព្ទអាចធ្វើបានទៅទៀត។ ឧទាហរណ៍: អ្នកចង់តម្លើង ឬកំនត់ល្បឿន CPU របស់ទូរស័ព្ទ ឬថេប្លេត គឺងាយស្រួលបំផុតដោយប្រើប្រាស់កម្មវីធីកែប្រែទៅតាមអ្វីដែលអ្នកចង់បាន ដូច្នេះអ្នកអាចទទួលបានល្បឿនមួយដែលអ្នកចង់បាន ហើយឧបករណ៍អ្នកក៏អាចដំណើរការបានរលូនជាងមុនផងដែរ តែត្រូវប្រយ័ត្នផងដែរថា ការធ្វើបែបនេះអាចនឹងខូចទៅដល់ផ្នែករឹងរបស់ម៉ាស៊ីន។
អ្វីដែលពិសេសជាងគេគឺការផ្លាស់ប្ដូរ ROMs តាមអំពើចិត្តយើង អ្នកអាចទាញយក ROMs ប្លែកៗមកតម្លើងនៅលើទូរស័ព្ទរបស់យើងបានយ៉ាងងាយមិនថា Rom នោះស៊េរីចាស់ ឬថ្មីឡើយ អោយតែវាជា ROMs សម្រាប់ដាក់អោយដំណើរការនៅលើទូរស័ព្ទរបស់យើង។ នាពេលនោះហើយអ្នកនឹងមានអារម្មណ៍ថាថ្មី ហើយប្លែកអស្ចារ្យ ដូចអ្នកបានប្រើប្រាស់ទូរស័ព្ទថ្មីស្រឡាងមួយគ្រឿងអញ្ចឹង ព្រោះ ROMs នីមួយៗមានរចនាបថ ឬ UI ខុសៗគ្នា ជាហេតុធ្វើអោយអ្នកប្រើប្រាស់មានអារម្មណ៍ទៅតាមហ្នឹងដែរ ហើយកុំភ្លេចណាទាល់តែទូរស័ព្ទអ្នក Root បានសម្រេចទើបអាចធ្វើវាទៅបាន។
4. រីករាយក្នុងការប្រើប្រាស់កម្មវិធីដ៏សំបូរបែប
អ្នកប្រើប្រាស់ Android ទាំងអស់ប្រាកដជាធ្លាប់ជួបបញ្ហាទាក់ទងនឹងកម្មវិធីប្រើប្រាស់ ពិសេសគឺកម្មវិធីជំនួយទៅដល់ទូរស័ព្ទដូចជាប្រភេទពពួក Tools សម្រាប់មុខងារពិសេសៗជាដើម តែប្រហែលជាអ្នកមិនអាចប្រើប្រាស់វាអោយអស់ពីសមត្ថភាពឡើយ នោះក៏ដោយសារតែកម្មវិធីនោះតម្រូវអោយទូរស័ព្ទយើង Root ទើបអាចដំណើរការវាបានពេញសមត្ថភាពដែលបានដាក់អោយពីក្រុមអ្នកផលិត។
ភាគច្រើនកម្មវិធី Android ដែលសំខាន់ៗ និងមានមុខងារសំបូរបែប និងពិសេសគឺសុទ្ធតែតម្រូវអោយទូរស័ព្ទនោះ Root បានសម្រេចទើបបានអាចប្រើប្រាស់មុខងាររបស់វាបាន អញ្ចឹងបានជាខ្ញុំប្រាប់ពីខាងលើហើយថា បើអ្នកជាអ្នកលេងកម្មវិធីគួរតែ Root ទៅគឺមិនខកបំណងឡើយ ហើយការតម្លើងពុម្ភអក្សរខ្មែរក៏ដូចគ្នា។
5. អាច Uninstall កម្មវិធី Bloatware ដែលមិនសំខាន់ក្នុងទូរស័ព្ទ
អ្វីទៅជាកម្មវិធី Bloatware ក្នុងទូរស័ព្ទ? Bloatware គឺជាកម្មវិធីទាំងឡាយណាដែលមានស្រាប់នៅក្នុងទូរស័ព្ទរបស់អ្នកដូចជាកម្មវិធី Calendar, Call, Message, Maps, People, Contact, Dropbox, Camera, Voice Search, Gmail, Play Store…..និងជាច្រើនទៀត ដែលអ្នកតែងតែឃើញមានភ្ជាប់មករួចជាស្រេច ហើយអ្នកមិនអាចលុប ឬ Uninstall ពួកវាបាន។ យ៉ាងណាក៏ដោយ បើអ្នកមិនពេញចិត្តកម្មវិធីនោះ ឬគិតថាវាមិនបានការសម្រាប់អ្នក អ្នកក៏អាចធ្វើការ Uninstall វាចោលបានផងដែរ ដោយប្រើប្រាស់វិធី Root ទូរស័ព្ទ។
វាមិនត្រឹមតែ Uninstall កម្មវិធីដែលអ្នកទើសចិត្តចេញពីទូរស័ព្ទរបស់អ្នកប៉ុណ្ណោះទេ អ្នកថែមទាំងអាចលុប Files ឯកសារ Core System បានទៀតផង ធ្វើអោយទូរស័ព្ទរបស់អ្នកចំនេញនូវមេម៉ូរីក្នុងម៉ាស៊ីនបានច្រើនគួរសម។
បញ្ជាក់: ខាងលើនេះគឺគ្រាន់តែជាអត្ថប្រយោជន៍ធំៗទាំង 5 ប៉ុណ្ណោះដែលភាគច្រើនអ្នកប្រើប្រាស់ស្មាតហ្វូន Android ទូទាំងពិភពលោកតែងតែ Root ទូរស័ព្ទរបស់ពួកគេដើម្បីមានសិទ្ធប្រើប្រាស់ទូរស័ព្ទពួកគេពេញលក្ខណៈ។ យ៉ាណាមិញវាក៏មានគុណវិបត្តិផងដែរ ពិសេសគឺទូរស័ព្ទថ្មីៗដែលទើបនឹងទិញ ព្រោះកាលណាអ្នក Root ទូរស័ព្ទមានន័យថាការធានាពីក្រុមហ៊ុននឹងត្រូវកាត់ផ្ដាច់ ឬត្រូវចាត់ទុកថាខុសច្បាប់ក្នុងការធានាពីក្រុមហ៊ុន អញ្ចឹងគួរតែប្រុងប្រយ័ត្នផងក្នុងការ Root ទូរស័ព្ទ 1 គ្រឿងៗ តែអ្នកក៏អាច Unroot បានវិញផងដែរ ដែលគ្មាននរណាដឹងឡើយ ហើយការ Root មិនមែនដូចគ្នានោះទេ ទូរស័ព្ទផ្សេងគ្នាមានរបៀប Root ផ្សេងៗគ្នា ខ្លះក៏ប្រហាក់ប្រហែលគ្នាផងដែរ។
